Historia e pazakontë e mbrojtësit që ndaloi Spanjën, ftesën e mori në LinkedIn

Ndeshja Spanjë–Kepi i Gjelbër ka hyrë tashmë në historinë e futbollit, jo vetëm për rezultatin, por edhe për rrjedhën dhe historitë që solli në fushë.

Takimi përfundoi 0–0, me kampionët në fuqi të Evropës dhe një nga favoritët e Kupës së Botës që nuk arritën të gjenin rrugën e golit ndaj një kombëtareje modeste nga një arkipelag me rreth gjysmë milioni banorë.

Ndeshja solli në vëmendje edhe mbrojtësin e Kepit të Gjelbër, Roberto “Pico” Lopes, një emër i panjohur për shumë tifozë, por që u bë një nga protagonistët e sfidës historike.

Lopes, që aktivizohet me Shamrock Rovers në Irlandë, ka një histori të veçantë. I lindur në Irlandë nga një nënë irlandeze dhe një baba nga Kepi i Gjelbër, ai u thirr në kombëtare në një mënyrë aspak të zakonshme për futbollin ndërkombëtar — përmes LinkedIn.

Fillimisht, mesazhin e parë të federatës e kishte injoruar, duke e menduar si spam, por një kontakt i dytë nga trajneri i përfaqësueses në anglisht e bindi se oferta ishte reale. Në vitin 2019 ai bëri debutimin e tij me Kepin e Gjelbër në një miqësore ndaj Togos.

Në ndeshjen e djeshme, ai ishte pjesë e një performance mbrojtëse të disiplinuar, ku Kepi i Gjelbër arriti të rezistojë ndaj presionit të vazhdueshëm të Spanjës, duke regjistruar një ndeshje me vetëm një faull të akorduar — një rekord historik në Kupën e Botës.

Kepi i Gjelbër është një nga surprizat e turneut, pasi u kualifikua për herë të parë në Botëror duke mbyllur grupin kualifikues me 23 pikë dhe duke lënë pas Kamerunin.

Sot, kombëtarja ishullore përfaqësohet nga lojtarë të shpërndarë në ligat e Evropës, SHBA-së, Lindjes së Mesme dhe Afrikës, duke ndërtuar një ekip që po shkruan një nga historitë më të veçanta të turneut.