Komisioni Europian miraton planin e rimëkëmbjes së Hungarisë, hapet rruga për fondet e BE-së

Komisioni Europian ka miratuar Planin e rishikuar të Rimëkëmbjes së Hungari, një hap i rëndësishëm për qeverinë e re të kryeministrit Péter Magyar në përpjekjet për të siguruar akses në miliarda euro fonde të Bashkimit Europian. Vendimi u mor në të njëjtën kohë kur Magyar mori pjesë në samitin e tij të parë europian si kreu i qeverisë hungareze.

Plani përfshin investime në infrastrukturën hekurudhore, sektorin e energjisë dhe programet e strehimit, ndërsa synon të zhbllokojë rreth 10 miliardë euro nga fondet e rimëkëmbjes pas pandemisë. Megjithatë, dokumenti duhet të marrë ende miratimin e shteteve anëtare të BE-së në Këshillin Europian gjatë muajit korrik përpara se fondet të mund të disbursohen plotësisht.

Sipas rregullave të BE-së, Hungaria duhet të përmbushë 27 kushte kyçe deri në fund të gushtit për të siguruar lirimin e fondeve. Në muajin maj, qeveria hungareze arriti një marrëveshje me Presidenten e Komisionit Europian, Ursula von der Leyen, për të zhbllokuar gjithsej 16.4 miliardë euro që ishin ngrirë gjatë qeverisjes së Viktor Orbán për shkak të shqetësimeve të Brukselit lidhur me korrupsionin dhe sundimin e ligjit.

Magyar erdhi në pushtet pas zgjedhjeve parlamentare të prillit, duke premtuar rikthimin e Hungarisë në rrjedhën kryesore të politikave europiane dhe normalizimin e marrëdhënieve me institucionet e BE-së, me fokus të veçantë në sigurimin e fondeve që kishin mbetur të bllokuara prej vitesh.