Tragjedi në Itali, polici vdes gjatë ndjekjes me motor të automjetit me shqiptarë

Dy shqiptarë janë ndaluar në kuadër të hetimeve për një ngjarje tragjike që ka tronditur Italinë, ku një oficer i Policisë Vendore të Milanos humbi jetën gjatë një ndjekjeje policore me motoçikletë ndaj një automjeti që nuk iu bind urdhrit për ndalim në një pikë kontrolli.

Ngjarja ndodhi të hënën në mbrëmje, rreth orës 21:30, në Via Vittorini, kur efektivët e Policisë Vendore vunë re një automjet tip Audi që lëvizte në mënyrë të dyshimtë. Sipas hetimeve paraprake, kur drejtuesit të mjetit iu bë shenjë për të ndaluar për kontroll, ai dyshohet se përshpejtoi ndjeshëm dhe u largua me shpejtësi të lartë, duke i dhënë fillim ndjekjes policore.

Në ndjekje u përfshinë disa efektivë, mes tyre edhe oficeri i identifikuar si Francesco Imprezzabile, pjesë e Policisë Vendore të Milanos. Gjatë operacionit, situata ka dalë jashtë kontrollit dhe kolegët kanë humbur kontaktin si me automjetin e dyshuar, ashtu edhe me motoçikletën e efektivit.

Pak më vonë, mjeti i shërbimit u gjet i ndalur në anë të rrugës, ndërsa jo shumë larg vendit të ngjarjes u gjet trupi i pajetë i 39-vjeçarit Francesco Imprezzabile. Sipas autoriteteve, ai kishte pësuar arrest kardiak. Pavarësisht ndërhyrjes së menjëhershme të ekipeve mjekësore, efektivi nuk mundi të mbijetojë dhe u konstatua i vdekur në vend.

Ngjarja ka vënë në lëvizje një hetim të gjerë nga autoritetet italiane, të cilat po punojnë për të rindërtuar me saktësi çdo fazë të ndjekjes. Hetuesit po analizojnë nëse ka pasur kontakt të drejtpërdrejtë mes automjetit në arrati dhe motoçikletës së policisë, apo nëse vdekja ka ardhur si pasojë e një incidenti gjatë manovrave të ndjekjes.

Për momentin, nuk përjashtohet asnjë pistë dhe po kryhen ekspertiza teknike mbi automjetet e përfshira, si dhe po analizohen pamjet e kamerave të sigurisë në disa zona të ndryshme, përfshirë Milano, Peschiera Borromeo dhe Pioltello. Autoritetet thonë se këto prova do të jenë vendimtare për zbardhjen e plotë të rrethanave.

Dy shqiptarë janë ndaluar nga policia italiane në kuadër të hetimeve dhe po merren në pyetje për të përcaktuar rolin e tyre të mundshëm në ngjarje. Prokuroria pritet të vendosë më tej mbi masat dhe pozicionin e tyre ligjor, në bazë të rezultateve të hetimeve teknike dhe dëshmive të mbledhura.

Ngjarja ka shkaktuar reagime të forta në radhët e Policisë Vendore të Milanos dhe në institucionet lokale. Kryetari i Bashkisë së Mazara del Vallo ka shprehur ngushëllimet e tij për familjen e efektivit të ndjerë, ndërsa drejtuesit e policisë kanë theksuar se janë në kontakt të vazhdueshëm me familjarët dhe po punojnë për të sqaruar plotësisht rrethanat e ngjarjes.

Autoritetet italiane theksojnë se hetimet vijojnë intensivisht dhe se çdo detaj i ndjekjes po analizohet me kujdes për të kuptuar saktësisht çfarë ndodhi gjatë asaj nate tragjike në Milano.