Chris Brown humb betejën në gjykatë, detyrohet t’i paguajë ish-punonjëses 13 milionë dollarë

Këngëtari i njohur amerikan Chris Brown është urdhëruar nga një gjykatë në Kaliforni t’i paguajë rreth 12.9 milionë dollarë dëmshpërblim ish-punonjëses së tij, Maria Avila, e cila u sulmua rëndë nga qeni roje i artistit në vitin 2020.

Juria vendosi në favor të Avila-s, e cila po punonte në rezidencën e Brown në Tarzana të Kalifornisë kur u sulmua nga Hades, një qen i racës Bari Kaukazian. Si pasojë e sulmit, ajo pësoi plagë të rënda në krah dhe fytyrë, iu nënshtrua dhjetëra qepjeve dhe transplanteve të lëkurës, ndërsa deklaroi se vazhdon të vuajë nga çrregullimi i stresit post-traumatik dhe dëmtime nervore që i kanë vështirësuar punën.

Gjatë procesit gjyqësor, Brown pranoi se kishte përgjegjësi për neglizhencë, por pretendoi se kishte paralajmëruar Maria Avila-n dhe motrën e saj të mos dilnin jashtë pa lejen e tij për shkak të rrezikut që paraqiste qeni. Të dyja e mohuan se një paralajmërim i tillë ishte bërë ndonjëherë.

Artisti dëshmoi gjithashtu se pas incidentit e futi qenin në kafaz, ndërsa roja i sigurisë telefonoi ambulancën. Brown u largua nga vendi i ngjarjes para mbërritjes së saj, duke deklaruar në gjykatë se donte të shmangte një “cirk mediatik” për shkak të famës së tij.

Përveç dëmshpërblimit prej 12.9 milionë dollarësh për Maria Avila-n, gjykata akordoi edhe 885 mijë dollarë për motrën e saj, Patricia Avila, për dëmin emocional, si dhe 50 mijë dollarë për bashkëshortin e Maria-s.

Ky është vetëm një tjetër kapitull në historinë e gjatë të problemeve ligjore të Chris Brown. Këngëtari ka qenë i përfshirë në një sërë procesesh gjyqësore ndër vite, përfshirë edhe rastin e famshëm të dhunës ndaj ish-partneres së tij, Rihanna, në vitin 2009. Aktualisht, ai përballet edhe me akuza të tjera penale në Mbretërinë e Bashkuar, ku pritet të dalë në gjyq në muajin tetor për një çështje të veçantë që lidhet me një sulm të dyshuar ndaj një producenti muzikor.