Të shtëna me armë zjarri në Dukagjin, vritet një person. Detajet e para

Të shtëna me armë zjarri janë regjistruar pasditen e kësaj të shtunë në Dukagjin. Fatkeqësisht nga të shtënat ka humbur jetën një person. Policia gjithashtu ka dalë me njoftim ku ka bërë me dije detajet e para.

Mësohet se viktima me inicialet A.K. është gjetur i pajetë në mjetin e tij pasditen e sotme rreth orës 19:00 në aksin Prekal-Kir. Policia ndodhet në vendin e ngjarjes dhe po punon për zbardhjen e shkaqeve të kësaj ngjarjeje të rëndë dhe identifikimin e autorit ose autorëve.

Njoftimi i policisë:

Shkodër/Informacion paraprak. Rreth orës 19:00, në aksin rrugor Prekal–Kir, është gjetur në automjet, i dyshuar i vrarë me armë zjarri, shtetasi A. K.

Menjëherë pas marrjes së njoftimit, shërbimet e Policisë kanë shkuar në vendngjarje dhe vijojnë kontrollet intensive në zonë për lokalizimin dhe kapjen e autorit/ve.

Ndërkohë, është ngritur një grup i posaçëm hetimor dhe nën drejtimin e Prokurorisë, po punohet intensivisht për fiksimin dhe administrimin e çdo prove që do t’i shërbejë hetimit, me qëllim zbardhjen e plotë të ngjarjes, dokumentimin ligjor të saj, si dhe identifikimin dhe kapjen e autorit/autorëve.