Italia shënon 1266 viktima, pneumologia shqiptare: Situata shumë e rëndë, janë shtuar pacientët në moshë të re

Italia shënoi një rekord të zi teksa në 24 orët e fundit u shënuan 250 të vdekur nga coronavirusi, duke e çuar në 1266 viktima në total.

Në një lidhje live nga Italia, mjekja shqiptare Brunilda Marku tha se situata gjatë ditëve të fundit është paraqitur shumë e vështirë, teksa është vënë re një shtim i numrit të pacientëve në moshë të re.

“Situata është shumë e rëndë, janë hapur reparte të dedikuara, jemi të mbushur me pacientë në mosha relativisht të reja. Italia ka marrë masa duke kufizuar lëvizjen e njerëzve, por vihet re shtimi i numrit të pacientëve në mosha të reja.

Mos të harrojmë që pacienti 0 në Itali ka qenë një 38-vjeçar, kështu që nuk janë vetëm tq moshuarit të prekur”, tha mjekja.

Sipas saj, periudha e rikuperimit nga kjo sëmundje është relativisht e gjatë duke nisur nga 3 javë e më tej në një periudhë të paparashikuar, kur duhen përsëritur sërish teste me tamponë për të parë gjendjen.

Ajo tregoi eksperiencën e saj me pacientët në repartin e pneomologjisë, ku pacientët në gjendje të rëndë janë të rënduar edhe nga ana psikologjike, pasi gjenden plotësisht të izoluar, me mjekë të maskuar kokë e këmbë të cilëve nuk arrijnë t’iu shquajnë as fytyrën.

 “Unë nuk kam frikë, por është fizikisht dhe psikologjikisht shumë e rëndë, jemi të veshur nga koka te këmbët, ata janë të terrorizuar përballë një mjeku të cilit nuk i shohin dot as fytyrën. Në repartin e terapisë intensive ka pacientë në gjendje shumë të rëndë, të cilit janë plotësisht të izoluar”, – tha ajo.