Shkarkohet nga detyra Shefi i Komisariatit të Sarandës

Syrja Bello, shefi i Komisariatit të Sarandës, u shkarkua nga detyra përmes një vendimi të marrë nga kreu i Policisë së Shtetit, Ardi Veliu. Në këtë pozicion u emërua Klodian Kondi.

Ndryshimi erdhi një ditë pasi kryeministri Edi Rama kritikoi punën e policisë në Sarandë për ngjarjet kriminale të ndodhura në qytetin bregdetar jugor, përfshirë një plagosje me armë zjarri në një lokal nate, ku u qëlluan dy persona. Rama e cilësoi të patolerueshme ngjarjen në fjalë dhe përsëriti thirrjen për më shumë veprim nga policia.

Sipas kreut të qeverisë, në këtë rast duhej ndëshkuar i gjithë zinxhiri komandues i policisë, pasi në shkelje flagrante të ligjit kishin lejuar veprimtarinë e lokalit pas orarit të lejuar.

Raportimet e shpeshta të krimeve gjatë kësaj periudhe në disa zona të Shqipërisë ka risjellë në vëmendjen publike nevojën për një kontrollon më të lartë policor.

Të enjten, kryeministri Rama i dha 100 ditë kohë Policisë së Shtetit për të ndryshuar në mënyrë rrënjësore efikasitetin e punës së saj në të gjithë territorin.

LEXONI GJITHASHTU:

• “Keni 100 ditë kohë”, kryeministri Rama paralajmëron ristrukturim të policisë së shtetit
• Ministri Çuçi paralajmëron ndryshime rrënjësore në polici: Disa gjyqtarë po nxjerrin kriminelë nga burgu
• Dëshmitari i ngjarjes së Velipojës tregon detajet nga momenti para përplasjes ku humbën jetën 4 persona