Kuvendi i Kosovës nuk miraton rezolutën për zbatimin e ‘Marrëveshjes së Uashingtonit’

Kuvendi i Kosovës nuk arriti të miratojë sot një rezolutë të thirrur nga opozita për zbatimin e “Marrëveshjes së Uashingtonit”.

Në seancën plenare morën pjesë 83 deputetë, prej të cilëve 24 nga Lidhja Demokratike e Kosovës votuan “pro” ndërsa nga Lëvizja Vetëvendosje u abstenua në shumicë.

Rezoluta e thirrur nga LDK i kërkonte qeverisë zbatimin e marrëveshjes së arritur më 4 shtator 2020 në Shtëpinë e Bardhë me SHBA-të dhe Serbinë. Sipas projekt-rezolutës qeveria e Albin Kurtit duhej t’i paraqiste Kuvendit një planveprimi për zbatimin e marrëveshjes.

Rezolutat parlamentare nuk janë detyruese, por thjesht rekomanduese ndaj qeverisë.

Marrëveshja e Uashingtonit, e cila u nënshkrua nga kryeministri i atëhershëm Avdullah Hoti i LDK-së me Presidentin serb Alaksandar Vuçiç dhe presidentin Donald Trump.

Ajo parashikon mos-angazhimin për të paktën një vit të Kosovës dhe Serbisë në lobim për njohje apo mos-njohje të pavarësisë. Nga ana tjetër SHBA-së i jepet përparësi për të investuar në HEC-in e Ujmanit.

Po kështu sipas marrëveshjes dy vendet angazhohen në ndërtimin e rrjetit rrugor dhe hekurudhor që lidh Prishtinën me Beogradin.

SHBA ka deklaruar disa herë që pret nga Kosova dhe Serbia zbatimin e marrëveshjes.