Shqipëria regjistron shtim infektimesh me COVID-19

Shqipëria ditët e fundit raporton një rritje të ndjeshme të infektimeve dhe vdekjeve si pasojë e COVID-19.

Ministria e Shëndetësisë në raportin ditor thotë se tre qytetarë kanë humbur jetën, ndërsa numri i rasteve të reja është rritur në krahasim me një ditë më parë, duke shkuar në 844.

Rritja e infektimeve ka çuar në rritjen e kërkesave të qytetarëve për t’u trajtuar në spitalet COVID.

Aktualisht në Spitalin Infektiv të QSUT po trajtohen 91 pacientë, kurse rastet aktive kanë shkuar mbi 7 000.

Shpërndarja gjeografike e rasteve aktive sipas qarqeve:
Tiranë 2687
Shkodër 1215
Vlorë 640
Fier 551
Durrës 477
Lezhë 367
Elbasan 332
Berat 269
Gjirokastër 198
Korçë 156
Kukës 102
Dibër 76.

Por pavarësisht kësaj, edhe numri i të shëruarve ka ardhur në rritje. Sipas MSH-së, 204 qytetarë kanë mposhtur infeksionin në 24 orë, duke e çuar totalin e tyre në 131,812.

Deri tani 2,483 qytetarë kanë ndërruar jetë si pasojë e coronavirus ku shumica e tyre kanë qenë me sëmundje të tjera bashkëshoqëruese.

Ministria e Shëndetësisë ka njoftuar se edhe muaji shtator do jetë muaj i hapur i vaksinimit për të gjithë qytetarët mbi 18 vjeç.

Komiteti Teknik i Ekspertëve tha të mërkurën se masat kufizuese aktuale do të mbeten në fuqi, ndërsa kërkoi nga qytetarët t’u drejtohen qendrave shëndetësore për të marrë vaksinën mbrojtëse ndaj COVID-19.

LEXONI GJITHASHTU:

• Komiteti Teknik nuk ndryshon masat anti-COVID