Qeveria hap thesin, jepet rroga minimale për personat që mbetën pa punë për shkak të COVID-19

Qeveria shqiptare ka vendosur që të paguajë rrogën minimale për personat që kanë mbetur pa punën për shkak të masave shtrënguese. Në Fletoren Zyrtare u publikua akti normativ i radhës, i cili parashikon se për bizneset me xhiro vjetore deri në 14 milionë lekë, shteti do të paguajë për personat e vetëpunësuar apo të punësuar rrogën minimale, pra 26 mijë lekë të reja.

Shtrirja e efekteve të këtij vendimi do të jetë për sa kohë do të zgjasë pandemia, por jo më gjatë se 3 muaj. Por, si do të mund të aplikohet për të përfituar këtë shërbim? I vetëpunësuari apo i punësuari duhet të aplikojë online tek drejtoria e tatimeve ku do të japë të dhënat e tij në mënyrë që të bëhet pjesë e listëpagesës së shtetit.

Për bizneset që deklarimet i bëjnë një herë në tre muaj, do të merret për bazë deklarimi i bërë në fund të vitit 2019, ndërsa për bizneset që bëjnë deklarime mujore, do të merret për bazë ajo e muajit janar.

Efektet e këtij akti normative e kanë filluar zbatimin që nga sot, dhe do të mund të përfitojnë pagën e muajit prill, që është shpallur nga shteti edhe si gjendje e fatkeqësisë natyrore dhe kosto e përllogaritur nga buxheti i shtetit shkon mbi 45 milionë euro.