A do të përfshihet Lea Ypi në politikë?

Pedagogia dhe shkrimtarja Lea Ypi, tha se ajo çdo ditë i betohet Kushtetutës edhe pse nuk është në Kuvend.

Këtë e tha në emisionin “Good Morning Albanians” në  Euronews Albania, kur u pyet nëse do i futet politikës apo jo.

“Lea Ypi i betohet çdo ditë Kushtetutës, pastaj e bën apo jo në Kuvend kjo nuk është shumë e rëndësishme, e rëndësishme është të ndjesh përgjegjësinë dhe të marrësh përsipër detyrën”- u shpreh ajo.

Ajo komentoi gjithashtu edhe mbi politikën në Shqipëri, ku u shpreh se nuk e kupton se përse bëhen debatet në Shqipëri.

“Me politikën shqiptare kam një vështirësi orientimi, sepse nuk arrij  të kuptoj se për çfarë bëhen debatet. Më duket gjithmonë se ato debatet për korrupsionin individual marrin rëndësinë  më të madhe, ndërkohë që shteti ka një politikë sociale, ekonomike, politikë të brendshme e të jashtme.

Nuk shoh nga opozita apo mazhoranca të ketë debate për problemet thelbësore të shtetit. Mendoj se kur ngremë çështjen e korrupsionit, duhet të kuptojmë se çfarë e shkakton korrupsionin. Pra nuk e kuptoj se cilat janë parametrat e debatit”- theksoi pedagogia.

LEXONI GJITHASHTU: 

• Pedagogu Laçi: Nuk ka ka treg për fizikën në Shqipëri, të rinjtë duan të ikin
• Delegatja rinore në OKB tregon bisedën me kryeministrin holandez