Abdixhiku-Kurtit: Je në kurthin e Serbisë, s’mund të krijosh stabilitet në veri

Kryetari i LDK-së, Lumir Abdixhiku ka kritikuar kryeministrin Albin Kurti, se s’po mund të krijojë dhe të ushtrojë sovranitet në veri.

Nëpërmjet një postimi në rrjetet sociale, Abdixhiku nënvizon se Kosova s’ka institucione në veri, që mund të organizojnë zgjedhje.

“Albin Kurti tashmë ka rënë në kurthin e Serbisë. Ai s’mund as të krijojë stabilitet e as të ushtrojë sovranitet në veri. Ai sot nuk ka as edhe një plan shtetëror për të ballafaquar gjendjen në veri”, ka shkruar Abdixhiku.

“Barrikadat e grupeve kriminale po bëhen tashmë të zakonshme, siç po bëhet i zakonshëm dhe mos-zëvendësimi i qindra policëve të dorëhequr, prokurorëve, gjyqtarëve e punëtorëve administrativë në veri që s’ushtrojnë detyrat pa të cilat shteti nuk ka përfaqësim. Për më tepër, sot Kosova as nuk ka institucione shtetërore në veri e as që mund të organizojë zgjedhje demokratike për t’i zgjedhur këto institucione aty. Pra jemi në vakum administrativ. Nëse ishte keq e rëndë në Veri, sot është dhe më keq e edhe më rëndë se që ishte paraprakisht. Kjo është e vërteta në veri dhe këtë të vërtetë institucionet e Kosovës s’mund ta lejojnë të normalizohet tani”, shprehet ai.

Kreu i LDK-së, thotë se qeveria e Kosovës duhet të kërkojë ndihmë.

“Qeveria e Kosovës duhet të kërkojë ndihmë. Nga aty të koordinojë çdo hap të ardhshëm me aleatë për të kthyer rendin e ligjin në veri. Sjellja e vonuar, apo e pakoordinuar, është vazhdimësi e tënkes në kurthin e Serbisë”.

LEXONI GJITHASHTU:

• Persona të panjohur qëllojnë me armë zjarri ndaj makinës në Kosovë
• Dosjet e nxehta, gazetari: 3 vite në detyrë të Dumanit, afat i shkurtër për hetime
• Dokumente të falsifikuara dhe ora të shtrenjta, dy të arrestuar në Durrës