Agjencitë e pronave: Të mos krijohet klimë denigruese ndaj të gjithë sektorit imobiliar

Shoqata Kombëtare e Ndërmjetësve të Pasurive të Paluajtshme, NAREA, ka reaguar për kontrollet e fundit të Administratës Tatimore në agjencitë imobiliare. Ajo shpreh shqetësimin, jo vetëm për formën e ushtrimit të tyre, por edhe për mënyrën e mediatizimit, që sipas saj përmban informacione të pavërteta dhe krijon një klimë denigruese ndaj gjithë sektorit.

Në reagimin e saj, NAREA dënon “demonizimin e një sektori të tërë”, i cili, sipas saj, u ofron mundësi biznesi rreth 1500 agjentëve imobiliarë, kryesisht të vetëpunësuar, që sigurojnë të ardhura për veten dhe familjet e tyre. Shoqata thekson se profesionistë të licencuar po përballen me pasoja reale reputacionale dhe ekonomike, si rezultat i një fushate që ushqehet në dëm të realitetit të tregut.

NAREA rikujton se profesioni i Ndërmjetësit të Pasurive të Paluajtshme është i rregulluar me ligj dhe përfaqëson hallkën e parë në përfaqësimin dhe mbrojtjen e interesave të palëve në një transaksion imobiliar. Për më tepër, shoqata nënvizon se prej vitesh ka komunikuar në mënyrë të vazhdueshme me institucionet qendrore të qeverisë dhe strukturat e inteligjencës financiare për sfidat e industrisë.

Sipas NAREA-s, një nga problematikat kryesore që ka ndikuar negativisht në treg është moszbatimi i disa elementeve kyçe të ligjit nga operatorë të tjerë ekonomikë, veçanërisht platforma online të publikimit të pronave. Kjo, sipas shoqatës, ka krijuar amulli në treg, duke lejuar hyrjen e aktorëve të palicencuar dhe informalë.