Aksidenti i autobusit me disa automjete, reagon Bashkia e Tiranës

Bashkia e Tiranës ka reaguar në lidhje me aksidentin e ndodhur këtë të hënë në afërsi të “Urës së Shallvareve”, ku u aksidentua një autobus i linjës së Unazës me disa automjete.

Përmes një njoftimi, bashkia u shpreh se po bashkëpunon me të gjitha institucionet për zbardhjen e shkaqeve dhe të rrethanave të këtij aksidenti.

Ndërkaq, pamjet filmike i janë vendosur në dispozicion Policisë Rrugore Tiranë.

“Po bashkëpunojmë me institucionet përkatëse deri në zbardhjen e plotë të shkaqeve dhe rrethanave, që çuan në këtë ngjarje! Të gjitha filmimet e kamerave të Policisë Bashkiake janë vendosur në dispozicion të Policisë Rrugore të Tiranës, teksa jemi informuar që të gjithë drejtuesit e mjeteve të përfshira janë testuar dhe intervistuar nga kolegët e policisë, për të çuar në hetimin e plotë të aksidentit, që fatmirësisht nuk pati pasoja në jetë njerëzish”, thuhet në njoftim.

Euronews Albania ka mundur të sigurojë pamjet e aksidentit të shumfishtë në Tiranë.

Siç shihet dhe nga pamjet e mësipërme, autobusi me një shpejtësi tej normave të lejuara përplaset me një automjet luksoz tip Porsche, i cli futet papritur në korsinë e emergjencës.

Në aksident u përfshinë 10 automjete dhe u plagosën 9 persona, përfshirë drejtuesin e mjetit tip Porsxhe, shoferin e autobusit, si dhe drejtues të mjeteve të tjerë dhe pasagjerë në urban.

LEXONI GJITHASHTU

• Pamjet e aksidentit të rëndë në Tiranë, momenti kur urbani përplaset me Porsche-n
• Çfarë e shkaktoi aksidentin e shumfishtë në Tiranë? Flet shefi i qarkullimit
• “Autobusi ishte shpejt”- Shoferi rrëfen dinamikën e aksidentit në Tiranë