“Akt sabotazhi mbi infrastrukturën kritike” – Rama reagon për sulmin në Veri

Kryeministri Edi Rama ka reaguar pas shpërthimit të ndodhur mbrëmjen e së premtes në kanalin e ujit Ibër-Lepenc në Zubin Potok që la pa ujë dhe energji elektrike veriun e Kosovës.

Përmes një postimi në platformën X, Rama e cilëson sulmin një akt sabotazhi që cenon jetën e qytetarëve të Kosovës dhe godet procesin e normalizimit të marrëdhënieve në rajon.

“Akti i sabotazhit mbi infrastrukturën kritike të furnizimit me ujë në kanalin e Ibër Lepencit është një krim i rëndë, i cili cenon jetën e qytetarëve të Kosovës dhe godet procesin e normalizimit të marrëdhënieve në rajonin tonë, ku të gjitha shtetet janë të përfshira në rrugën e integrimit në Bashkimin Europian. Kjo goditje kriminale duhet zbardhur e ndëshkuar sa më parë me mbështetjen e partnerëve ndërkombëtarë. Ndërkohë Bashkimi Europian duhet të heqë menjëherë sanksionet e mbetura ndaj Kosovës dhe të riangazhohet në një format të ri dialogu për normalizim mes Kosovës dhe Serbisë. Formati ekzistues ka dështuar të prodhojë rezultatet e dëshiruara dhe është koha që çështjet e dialogut të kalojnë përmes marrëdhënieve bilaterale të BE-së me Kosovën apo Serbinë, si dy shtete njësoj të pavarura prej njëra-tjetrës, ku fati europian i secilit shtet s’mund të varet nga dëshirat a mosdëshirat e shtetit tjetër; ashtu sikundër fati europian i krejt rajonit s’mund të varet nga mosnjohja e Kosovës nga Serbia apo 5 shtete anëtare të BE-së”, shprehet Rama.

LEXONI GJITHASHTU:

• Sulmi në infrastrukturën jetike të Kosovës, të gjitha detajet e reagimet
• 15 kilogramë eksploziv, Sveçla jep detaje nga sulmi terrorist