Akte anti-semite në Evropë, 183 të arrestuar në Francë, sulmohet sinagoga në Berlin

Berlini u kthye në skenën e një prej incidenteve më të fundit anti-semite në Evropë. Një sinagogë u sulmua me bombë molotov gjatë natës. Sulmi nuk shkaktoi as dëme dhe as të lënduar, por u cilësua si “i neveritshëm” nga qeveria gjermane.

Dy persona u panë të largoheshin nga objekti i kultit dhe policia ka nisur një hetim.

“Dy bomba molotov u hodhën ndaj ndërtesës rreth orës 4 të mëngjesit. Falë Zotit, asgjë nuk ndodhi. Shishet nuk e arritën godinën dhe ranë në rrugë”, tha Shlomo Afanasev, rabin, Berlin.

“Qartazi, ne nuk do t’i pranojmë kurrë sulmet ndaj institucioneve hebraike. Gjithashtu nuk do të lejojmë eventet e dhunshme që shoqërohen me parulla anti-semite”, u shpreh Olaf Scholz, kancelar i Gjermanisë.

Gjermania, Italia, Belgjika dhe Franca janë mes vendeve që kanë rritur masat e sigurisë. Ministri i Brendshëm francez tha se 183 arrestime janë kryer në Francë për akte anti-semite që nga sulmi i Hamasit më 7 tetor.

Ndërkohë, kërcënimet e rreme janë një çështje më vete, pasi kanë çuar në evakuimin e hapësirave publike. Autoritetet u kujtojnë njerëzve se përhapja e lajmeve të rreme mund të dënohet me burg dhe gjoba të rënda.

LEXONI GJITHASHTU:

• Me kërkesë të Biden, Izraeli do të lejojë futjen e ndihmave në Gazën e rrethuar
• Familjarët e pengjeve në duart e Hamasit protestë para ambasadës gjermane në Izrael