Aktivisti i të drejtave të njeriut Oleg Orlov u dënua nga një gjykatë në Moskë me dy vjet e gjysmë burg pasi u shpall fajtor për diskreditim të forcave të armatosura ruse.

Orlov u dërgua në paraburgim menjëherë pas dënimit, transmeton Interfax.

Në fjalët e tij përfundimtare në gjyqin të hënën, Orlov dënoi “mbytjen e lirisë” në Rusi, raportoi Reuters.

Orlov fillimisht u gjobit me 1,628 dollarë në Gjykatën e Qarkut të Moskës vitin e kaluar, por u urdhërua një rigjykim dhe prokurorët kërkuan një dënim me burg prej dy vjet e 11 muaj.

Rasti iu referua sërish gjykatës me akuzën e sqaruar, sipas së cilës Orlov ka kryer një vepër penale të motivuar nga armiqësia dhe urrejtja ndaj personelit ushtarak.

Ndaj Orlovit janë bërë hetime për shkak të një teksti të publikuar në një nga rrjetet sociale, në të cilin thuhet se diskreditohen forcat ruse.

Për më shumë se dy dekada, Orlov, 70 vjeç, ishte një nga drejtuesit e grupit të të drejtave të njeriut Memorial, i cili fitoi Çmimin Nobel për Paqen në vitin 2022, një vit pasi u ndalua dhe u shpërbë në Rusi.

LEXONI GJITHASHTU:

• Rusia ndalon eksportet e benzinës
• Deputeti ukrainas: Nëse fiton Rusia do ketë ndryshim kufijsh dhe gjakderdhje në botë