Aktivistja: Bukë dhe fasule hanë kryesisht fëmijët nën 5-vjeç në fshatra

Aktivistja për të drejtat e fëmijëve, Suela Koçibellinj, është shprehur se në zonat rurale të Shqipërisë ka varfëri, e cila ndikon në kequshqyerjen e fëmijëve.

Komentet Koçibellinj i bëri në emisionin “Good Morning Albanians” në Euronews, ku tha se në fshatra fëmijët nën 5-vjeç konsumojnë kryesisht bukë dhe fasule.

Ajo tha gjithashtu se mendonte se shifra e fëmijëve të kequshqyer në Shqipëri është më e lartë se 47 %, shifër e nxjerrë nga një studim.

“Kemi fëmijë ose familje në kushte ekstreme në zonat rurale. Janë ata të pamundurit që themi ne që kanë qëndruar. Realisht ka varfëri dhe unë mendoj se shifra e fëmijëve të kequshqyer në Shqipëri për arsye ekonomike është më e lartë se 47 %. Këtu do ecja patjetër për këto 4 ushqime dhe jo 2. Nën 5 vjeç janë patjetër më të rrezikuar.

Janë komplet varësi e prindërve. Nëse prindërit nuk kanë mundësi ekonomike, atëherë ky fëmijë është vetëm në shijen apo orientimin që i jep prindi. Buka është gjëja kryesore dhe bukën e bëjnë vetë. Konsumojnë fasule, dimër verë, mëngjes, drekë, darkë. Ka dhe zona që nuk ka patate fare atje.

Nga maja e malit nuk del dot për të blerë patate. Nuk arrin ta sajojnë dot. 5 vjeçari ndikohet këtu. Këtu pastaj hyn edhe fenomeni, që ka një dëshirë për t’i plotësuar dëshirat fëmijës. Nëse shkon në orën e pushimit në shkolla, shikon ose paketime kroasantësh, ose paketime patetinash. Por që varfëri ka, ka, nuk e mohojmë dot”, tha Koçibellinj.

LEXONI GJITHASHTU:

• 1 në 5 adoleshent obez, OBSH: Shkak kequshqyerja dhe mungesa aktivitetit fizik
• Nutricionisti: 8 mijë shqiptarë vdesin në vit nga kequshqyerja