Alarm në qytetin gjerman Mehernih, frikë nga kontaminimi i ujit në bazën ushtarake

Autoritetet në një qytet në perëndim të Gjermanisë dhanë alarmin se uji mund të jetë i kontaminuar si pasojë e një ndërhyrjeje në tubacionet.

Pas një analize paraprake të kampioneve të ujit në Mehernih, autoritetet thanë të premten se aktualisht ata mund ta përjashtojnë praninë e kimikateve të huaja dhe substancave biologjike në ujë, por banorët duhet të bëjnë kujdes gjatë përdorimit të tij.

Këtu përfshihet zierja e ujit përpara konsumit, përdorimi i tij vetëm për qëllime shtëpiake dhe pajisjen me ujë me shishe si masë kujdesi.

Në qytetin Mehernih ndodhen komplekse që i përkasin forcave të armatosura federale të Gjermanisë, të cilat furnizohen nga i njëjti rezervat uji.

Autoritetet u alarmuan për një kontaminim të mundshëm pasi një vrimë u gjet e hapur në gardhin me tela që rrethon kompleksin ushtarak.

Mehernih ndodhet në afërsi të Këlnit, ku një incident i ngjashëm u verifikua ditën e mërkurë. Edhe në këtë rast, autoritetet e bazës dhanë alarmin dhe rrethuan kompleksin nën dyshimin se uji mund të kishte qenë i kontaminuar me lëndë toksike.

Autoritetet gjermane deklaruan më tej se, pavarësisht se brigada e zjarrfikësve kishte konfirmuar se uji në Mehernih nuk ishte i kontaminuar, teste të mëtejshme do të kryhen për të verifikuar nëse në të ka prani bakteresh.

LEXONI GJITHASHTU:

• Stuhi në Evropën Perëndimore, reshje dhe përmbytje në Gjermani e Belgjikë
• Ish-bunkeri nazist kthehet në kompleks hotelesh dhe argëtimi në Gjermani