Alarm për diabetin në Europë, Shqipëria mes vendeve me prevalencë të lartë

Diabeti mbetet një nga sfidat kryesore shëndetësore në Rajonin Europian, ndërsa Organizata Botërore e Shëndetësisë paralajmëron për rritje të vazhdueshme të rasteve dhe mungesë të aksesit në trajtim.

Sipas OBSH-së, më shumë se 85 milionë njerëz në Europë jetojnë me diabet, ndërsa miliona të tjerë mbeten të padiagnostikuar ose pa kujdesin e duhur shëndetësor. Në disa vende, vetëm një në tre pacientë merr trajtimin që i nevojitet.

Kjo situatë bën që shumë raste të zbulohen me vonesë, kur sëmundja ka shkaktuar tashmë komplikacione të rënda si verbëri, infarkt, goditje në tru apo paaftësi të përhershme.

Edhe në Shqipëri, sipas të dhënave të raportuara, një pjesë e madhe e pacientëve diagnostikohen në faza të avancuara, kur diabeti ka përparuar ndjeshëm. Prevalenca e sëmundjes në vend vlerësohet rreth 10.6%, një nga më të lartat në rajon.

Për të adresuar këtë situatë, OBSH dhe Fondacioni Botëror i Diabetit kanë nisur një projekt në Kirgistan, Taxhikistan dhe Uzbekistan, me fokus forcimin e kujdesit parësor, edukimin e pacientëve dhe përmirësimin e monitorimit të sëmundjes.

Nisma synon gjithashtu parandalimin e komplikacioneve përmes kontrollit më të mirë të sheqerit në gjak, tensionit arterial, si dhe kontrolleve të rregullta të syve dhe këmbëve.

Ekspertët theksojnë se investimi në menaxhimin e diabetit ndihmon jo vetëm pacientët, por edhe ul kostot për sistemet shëndetësore duke reduktuar shtrimet në spitale dhe komplikacionet afatgjata.