Alibeaj kërkesë qeverisë: Të shpallet gjendja e jashtëzakonshme në 3 qarqe

Deputeti Enkelejd Alibeaj i kërkon qeverisë që të shpallet gjendja e fatkeqësisë natyrore në Shkodër, Lezhë dhe Durrës për shkak të situatës së motit.

Në një deklaratë për mediat u shpreh ajo që e bën më të rëndë situatën është dëmtimi i shëndetit dhe jetës së qytetarëve, ku përmendi dhe humbjen e jetës së babë e bir në  Malësinë e Madhe mesditën e së dielës.

“Situata e reshjeve të ditëve të fundit ka shkaktuar problematika të rënda në zona të ndryshme të qarqeve Shkodër, Lezhë dhe Durrës. Si pasojë e përmbytjeve janë dëmtuar arat me të mbjella, bagëtitë, shtëpitë e qytetarëve, pasuri të trashëgimisë kulturore, si rasti i Urës së Bahcallëkut në Shkodër.

Por, ajo që e bën më të rëndë situatën është dëmtimi i shëndetit dhe jetës së qytetarëve, sic ishte rasti i tragjik i humbjes së jetës së dy qytetarëve, babë e bir, në Malësinë e Madhe. Nisur nga ky bilanc tragjik për shëndetin, jetën, pronat dhe pasuritë e qytetarëve të këtyre zonave, ne vlerësojmë se përmbushen kriteret kushtetuese dhe ligjore për shpalljen e gjendjes së fatkeqësisë natyrore.”- thotë ai.

Shqipëria prej tre ditësh është përfshirë nga reshjet e dendura të shiut, ku situata më problematike ka qenë në Shkodër.

Si pasojë e motit të keq dy persona në Malësi të Madhe humbën jetën mesditën e së dielës pasi makina me të cilën po udhëtonin u mor përpara nga rrjedha ujit.

Ndërkohë në Durrës problematike paraqitet situata në zonën e ish-Kënetës, ku ditën e djeshme uji u fut deri në katet e para të banesës.

LEXONI GJITHASHTU: 

• Mbi 1600 hektarë tokë e përmbytur në Shkodër, 26 familje janë evakuuar
• Arrestohet 19-vjeçari që lëvizte me armë në Durrës, i dënuar më parë për plagosje