Ambasadori serb në SHBA: KFOR-i të marrë nën kontroll veriun e Kosovës

Ambasadori i Serbisë në Shtetet e Bashkuara kërkon që KFOR të marrë në kontroll veriun e Kosovës dhe të zëvendësojë përkohësisht autoritetet kosovare atje.

Kështu ka deklaruar për mediat diplomati serb, Marko Gjuriç, i cili beson se Trupat paqeruajtëse të NATO-s do të ndihmojnë në zbatimin e marrëveshjeve të dakordësuara mes dy vendeve.

Marrëveshje të cilat, Gjuriç thotë se janë shkelur nga kryeministri I Kosovës Albin Kurti në momentin e ndërhyrjes së policisë, duke krijuar një “Forcë Policore monoetnike”, aty ku sipas marrëveshjes policët duhet të ishin serbë.

Të tillë argument pas ngjarjes e kanë shfaqur edhe autoritetet në Serbi.

Ministri I jashtëm Ivica Daçiç pas ngjarjes, deklaroi se policia e Kosovës nuk duhet të kishte ndërhyrë, dhe duhet të kishte kërkuar menjëherë mbështetjen e KFOR.

Kjo  pasi sipas tij aty ku shumica e banorëve janë serb, forcat policore duhet të përbëhen nga serbët.

Mirëpo Serbët  nisën të jepnin dorëheqjet nga strukturat e policisë së Kosovës,  që në nëntor të 2022-shit, duke refuzuar çdo përpjekje dhe negociatë për rikthimin e tyre në krye të detyrës.

Pretendimet e Serbisë për ligjshmërinë e ndërhyrjes së autoriteteve Kosovare në sulmin e Banjskës, ranë poshtë me një reagim të sekretarit amerikan të shtetit një ditë pas ngjarjes.

Antony Blinken pasi dënoi ashpër sulmin, bëri të qartë se policia e Kosovës ka përgjegjësi të plotë për zbatimin e sundimit të ligjit në territorin e saj dhe se SHBA-ja e njeh dhe e respekton rolin e Policisë së Kosovës si reaguese e parë në situata emergjente dhe krize.

LEXONI GJITHASHTU:

• Kurti kundër Ramës: Veriun e ruajmë vetë, KFOR të jetë mbështetës.
• Analisti: Pa KFOR-in brenda, Kosova e ka të vështirë ruajtjen e pavarësisë