Ambasadorja e SHBA në NATO: Zona e ndalim-fluturimit, jo opsion në tryezë

Ambasadorja e Shteteve të Bashkuara në NATO ka theksuar një ditë përpara mbajtjes së samitit të jashtëzakonshëm me ministrat e mbrojtjes të Aleancës Euroatlantike se vendosja e zonës së ndalim-fluturimit nuk është ndër opsionet që po konsiderohet nga palët.

“Mesazhi që ka ardhur nga aleanca e NATO dhe Uashingtoni, përfshi këtu dhe presidenti, është se vendosja e ndalim-fluturimit nuk është e mundur për momentin. Unë mendoj se qëllimi ynë i përbashkët është t’i japim fund kësaj lufte – ta bëjmë Rusinë të largohet nga Ukraina dhe të ndalë sulmet kundër ushtrisë ukrainase dhe civilëve”, tha ambasadorja Julianne Smith.

Sipas ambasadores amerikane në NATO, vendosja e zonës së ndalim-fluturimet mund ta çojë situatën në ‘rrugën e gabuar’.

“Ne nuk duam ta përhapim këtë konflikt. Ne nuk duam ta shohim të përhapet përtej kontekstit aktual. Ndaj ekziston një ndjesi se nëse do të konsideronim vendosjen e zonës së ndalim-fluturimit, kjo mund të na çonte në drejtim të gabuar”.

Ambasadorja Julianne Smith theksoi se Kongresi miratoi së fundmi një paketë mbështetje prej $13.6 miliardë, përpos fondeve të akorduara që emërimi i presidentit Joe Biden.

“Shtetet e Bashkuara kanë dhënë – që nga koha kur presidenti mbërriti në Zyrën Ovale në fillim të 2021 – $1.2 miliardë në formën e ndihmave për sigurinë e Ukrainës, prej këtyre $550 milionë në dy javët e fundit”, tha Smith.

Sipas saj, SHBA dhe vendet aleate janë vazhdimisht në kërkim të mënyrave sesi mund t’i vijnë në ndihmë Ukrainës.

“Ju keni dëgjuar Presidentin dhe Sekretarin e Mbrojtjes të flasin për faktin se jemi vazhdimisht duke vlerësuar çfarë kërkesash shtesë mund të kenë nevojë miqtë tanë në Ukrainë. Do të shohim dhe aspekte të tjera apo format të tjera të mbrojtjes ajrore që do të mund t’ia furnizojmë Ukrainës”, tha Smith.