Opozita në RMV nuk i ka ndryshuar qëndrimet antishqiptare, thotë analisti

Shpëtim Pollozhani, analist politik në Maqedoninë e Veriut tha për Euronews Albania se opozita në RMV nuk i ka ndryshuar qëndrimet e veta antishqiptare, edhe pse vazhdimisht është ndihmuar nga parti shqiptare për t’u ngritur.

“Partitë politike shqiptare e rehabilituan VMRO të jetonte edhe pse ajo u ngrit në antishqiptarizëm. Shqiptarët janë boshti kryesor i RMV, por ende nuk e kanë kuptuar pozicionin e tyre. Mendoj se kjo qeveri do vijojë të jetë në pushtet pasi i kanë votat dhe mbështetjen e partive të vogla shqiptare”, u shpreh z. Pollozhani.

Vendimi i Zoran Zaev për t’u dorëhequr nga posti i kryeministrit dhe kryetarit të partisë, sipas z. Pollozhani është akt moral që rrallë e ka bërë një lider në Ballkan.

Por, ai u shpreh skeptik se Zaev do t’i qëndrojë deri në fund këtij vendimi.

“Nuk besoj se ky akt moral do të qëndrojë deri në fund, nëse e mban fjalën, duhet një kryeministër tjetër nga shumica”, tha analisti.

Ai e cilësoi ‘Open Balkan’ një nismë të iniciuar me probleme që nga fillimi, ndaj mungesa e Zoran Zaev sipas analistit, ia ka dobësuar njërin krah në negociata kryeministrit shqiptar Edi Rama.