Analisti Plator Nesturi: Programi i PD-së nuk vinte si rezultat i një pune të thelluar

Partia Socialiste ishte më e qartë  dhe më e sinqertë në objektivat e saj elektorale në krahasim me rivalët politikë. Kështu u shpreh analisti Plator Nesturi gjatë një interviste për Euronews Albania.

“PS të paktën në parashikimet e saj ishte shumë e qartë dhe shumë më pranë realitetit”, tha ai. Ai theksoi se qytetarët duan sinqeritet në premtimet e partive politike.

“Gjithsesi qytetari kërkon të jesh me i sinqertë, më i drejtpërdrejtë dhe më i moralshëm. Qytetari kërkon sinqeritet. Ka ikur koha e demagogjisë”, theksoi ai.

Madje ai u shpreh kritik ndaj programit të PD-së, që sipas Nesturit ishte i nxituar dhe nuk bazohej në një punë të thelluar.

“Realisht të programi i PD në shumë detaje ishte i nxitur dhe nuk vinte si rezultat i një pune të thelluar, por më tepër dukej si magazinim premtimesh”, tha ai.

Analisti thotë se pas këtij rezultati është e udhës që z. Basha të respektojë çështjen e dorëheqjes nga drejtimi i Partisë Demokratike, standard ky i vendosur më parë nga ish-kreu i saj Sali Berisha në vitin 2013 kur humbi zgjedhjet përballë Edi Ramës.

“Është në të drejtën tij të bëjë këtë gjë [dorëheqjen] dhe është një element që duhet respektuar çështja e dorëheqjes, por ky është një proces që i takon Partisë Demokratike. PD duhet të ringrihet mbi vetveten”, tha ai.