Anglia merr fitoren e tretë, kreu i grupit i takon Greqisë, Austria “spektakël”

Anglia ka shkuar në kuotën e 9 pikëve në grupin 2 të Ligës së Kombeve, por kjo nuk do të thotë që 3 luanët kryesojnë, pasi ekipi që ka bërë më mirë se ata, e madje duke e mposhtur në ndeshje direkte, është Greqia. Helenët kryesojnë me 12 pikë pas 4 ndeshjesh, duke u kthyer në surprizën e këtij edicioni, të paktën deri më tani.

Mbrëmjen e së dielës, Le Carsley mori fitoren e tretë si trajner i ekipit A, ndërsa mposhtën Finlandën. Grealish, TAA (Trent Alexander-Arnold) dhe Rice ishin autorët e golave, me Hoskonsen që shënoi për vendësit, duke vulosur rezultatin 1-3. Greqia mposhti Irlandën me golat e Bakasetas dhe Mantalos, duke hipotekuar triumfin numër 4 me një rekord golash, 9 të shënuar e 1 të pësuar.

Spektakli i mbrëmjes mban emrin e Austrisë, e cila shpartalloi Norvegjinë e Haaland në shifrat 5-1. Një përballje e dominuar plotësisht, me vendësit që gjetën golin e parë me Arnautovic, por nordikët barazuan në fraksionin e parë me Sorloth. Pjesa e dytë do të kthehej në festival për austriakët, ku kapiteni Arnautovic dyfishoi, e më pas me radhë shënuan Lienhart, Posch dhe Gregoritsch. Me këtë triumf të Austrisë, në grupin E shkon në kuotën e 7 pikëve, aq sa dhe Sllovenia e Norvegjia.