Ansambli Popullor në Gjirokastër, turneu sjell këngë dhe valle nga të gjitha trevat

Ansambli i Këngëve dhe Valleve Popullore ka nisur nga Gjirokastra turin e tij në jug të vendit. Me këngë dhe valle nga të gjitha trevat, artistët e Ansamblit çuan peshë zemrat e spektatorëve të qytetit të Festivalit.

“Kënaqësi shumë e madhe që ne e fillojmë turin në Gjirokastër në një vend që ka një traditë të madhe të artit të kulturës dhe gjithçka. Kemi një koncert në Gjirokastër që e bëmë sot, në Përmet, jemi në Libohovë, dhe në kthim jemi edhe në Tepelenë.

Me një program të larmishëm të ansamblit, me gjërat më të zgjedhura, më të mira i kemi menduar që ne ti shfaqim për publikun. Ne u kënaqëm jashtë mase sepse publiku u shkri bashkë me ne, patëm, një pritje kaq të ngrohtë saqë unë kam ngelur pa fjalë, të them të drejtën unë dhe gjithë trupa bashkë,”-tha Alban Tahiri, udhëheqës artistik

Por më emocionues ky koncert ishte për këngëtaren Denisa Gjezo, që rikthehej pas shumë kohësh në skenën e qytetit të saj, aty ku nisi karrierën si këngëtare e muzikës popullore.

“Këtu kam hedhur hapat e mia të parë. Këtu ku u rrita, ishte vërtet një emocion shumë, shumë i madh dhe tani që unë kam ardhur dhe jam bërë pjesë e Ansamblit, ishte akoma një emocion më i fortë,”-tha Denisa Gjezo, këngëtare

Gjirokastra po bëhet gati të presë në qershor festivalin folklorik kombëtar, i cili rikthehet pas 8 vitesh në skenën e kalasë së qytetit të gurtë.

LEXONI GJITHASHTU:

• Mishi e qumështi shiten shtrenjtë, këtë sezon çmimet janë 15% më të larta se vjet
• Punimet në shëtitore shqetësim për pushuesit në Durrës, ankohen bizneset