Aplikimi i Kosovës në KiE, Bërnabiç: Kulm i cinizmit

Kryeministrja e Serbisë Ana Bërnabiç tha se Serbia pret nga vendet e Quintit dhe anëtaret e G7-së që të mos e mbështesin aplikimin e Kosovës në Këshillin e Evropës.

Vendet e Quintit janë: Shtetet e Bashkuara të Amerikës, Franca, Gjermania, Italia dhe Mbretëria e Bashkuar.

Anëtarët e G7 janë: Kanadaja, Franca, Gjermania, Italia, Japonia, Mbretëria e Bashkuar dhe Shtetet e Bashkuara.

Në një intervistë për një televizion serb, ajo tha se e konsideron aplikimin e Kosovës në këtë organizatë ndërkombëtare si “kulm të cinizmit”, duke iu referuar moslejimit të mbajtës së zgjedhjeve serbe në territorin e Kosovës në prill.

“Ata po aplikojnë në një institucion, qëllimi përfundimtar i të cilit është respektimi i të drejtave të njeriut, mbrojtja e demokracisë dhe sundimit të ligjit. Ky është kulmi i cinizmit, jo shkelje e marrëveshjes sepse jemi mësuar me të. Ata tashmë kanë thënë se nuk kanë ndërmend të respektojnë marrëveshjen e Brukselit. Kosova po aplikon në Këshillin e Evropës për ata që kanë anuluar të gjitha të drejtat e serbëve nga Kosova. Unë jam veçanërisht e interesuar të shoh se si do të përgjigjen vendet e Quintit”, tha ajo.

Kosova të enjten ka aplikuar për anëtarësim në Këshillin e Evropës. Aplikimin në selinë e Këshillit të Evropës, në Strasburg, e ka bërë ministrja e Punëve të Jashtme dhe Diasporës e Kosovës, Donika Gërvalla.

Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës. Këshilli mbron lirinë e shprehjes dhe të mediave, barazinë dhe minoritetet në vendet anëtare.

Këshilli i Evropës ka 46 shtete anëtare. Deri më 16 mars anëtare me të drejtë vetoje ishte Rusia, që u përjashtua pas sulmit ushtarak të paprovokuar ndaj Ukrainës.

Pa Rusinë, Kosova i ka siguruar 2/3 e votave të nevojshme për votimin final.

LEXONI GJITHASHTU:

• Ambasadori gjerman shpreh mbështetjen për anëtarësimin e Kosovës në KiE