“Arrestimet në AKSH” Karamuço jep detaje: Ja si funksiononte skema

Eksperti i kriminalistikës, Ervin Karamuço, ka analizuar në emisionin “Now” në Euronews Albania kërkesën e SPAK drejtuar Kuvendit për heqjen e imunitetit të zv/kryeministres Belinda Balluku, si dhe për aksionin hetimor mbi tenderat e AKSHI-t, ku janë përfshirë disa biznesmenë.

Sipas Karamuços, pritet seanca e verifikimit të kushteve për të sqaruar për çfarë provash bëhet fjalë.

“Akuzat janë të rënda, do doja të shikoja në seancën e verifikimit të kushteve që besoj do zhvillohet brenda tre ditëve, të kuptoja se për çfarë flitet konkretisht. A jemi përpara një kallëzimi të një prej biznesmenëve dhe ai pretendon se është dhunuar apo i është hequr liria e tij në mënyrë të paligjshme, apo ka prova të tjera që shoqërojnë këtë gjë. Ka kryqëzim të dhënash. Janë ende hetimet paraprake”, tha ai.

I pyetur për moszbatimin e masave ndaj Ergys Agasit dhe Ermal Beqirit, dy biznesmenë të përfshirë në dosje, Karamuço u shpreh se mungon ende një informacion zyrtar. Më tej, Karamuço thekson se Dubai nuk është më destinacioni më pak i rrezikshëm për ata që duan të arratisen.

“Nuk ka ende një informacion, këtë detaj duhet ta jap policia. Jo në këtë rast, por në raste të tjera Dubai po ngel një lloj legjende, por në fakt janë gjetur disa vende të tjera që janë më komode sesa Dubai i cili është bërë një vend jo shumë i sigurtë për ata që duan të arratisen. Se për çfarë vendi konkretisht nuk aludoj dot.

Është një hetim kompleks, i madh që ka të bëjë me aspekte adiminsitrative dhe ekonomiko-financiare të bizneseve. Këto ecin paralelisht nga ku prokurori nuk vendos dot vetë pa pyetur ekspertët financiarë brenda SPAK-ut. Pa analizën e tyre asgjë nuk hecë dot në hetimet paraprake”, përfundoi eksperti i kriminalistikës, Ervin Karamuço.

LEXONI GJITHASHTU:

• “Imuniteti i Ballukut”, gazetarja: Mbledhja mund të jetë me dyer të mbyllura, ja pse
• Gazetari Ferhati zbulon prapaskenat: Ja çfarë kërkon SPAK nga Kuvendi për Ballukun