Arrestohen dy mjekë në QSUT, merrnin ryshfet për kryerjen e skanerit

Një mjek dhe një specialist teknik për bërjen e skanerit janë arrestuar në Qendrën Spitalore Universitare Nënë Tereza.

Burime për Euroneës bëjnë me dije se mjeku Nazmi Metaliu dhe tekniku i imazherisë Astrit Masnaku, janë prangosur për shkak se merrnin para për të ofruar bërjen e skanerit për pacientët.

Materialet procedurale në ngarkim të tyre i kaluan prokurorisë së Tiranës, për veprime të mëtejshme.

“Specialistët e Seksionit për Hetimin e Krimeve Ekonomike dhe Financiare të DVP Tiranë, si rezultat i një hetimi disamujor, të ndjekur me metoda proaktive, në bashkëpunim me Prokurorinë pranë Gjykatës së Rrethit Gjyqësor Tiranë, me qëllim konstatimin e rasteve të korrupsionit dhe nxjerrjen përpara përgjegjësisë penale, të autorëve të tyre, organizuan dhe finalizuan operacionin policor të koduar “Skaneri”.

Si rezultat i këtij operacioni, u vunë në pranga shtetasit: N. M., 63 vjeç, banues në Tiranë, me profesion mjek; A. M., 51 vjeç, banues në Tiranë, me profesion teknik imazherie.

Nga veprimet hetimore, ka rezultuar se këta shtetas, në bashkëpunim me njëri-tjetrin, gjatë ushtrimit të detyrës, iu mundësonin qytetarëve të ndryshëm, kundrejt shumave monetare, bërjen e skanerit, në kundërshtim me rregulloren e Spitalit, për kryerjen e kësaj procedure”, thuhet në njoftimin e policisë.

LEXO GJITHASHTU:

• EMRAT/ Ishin mbajtur 3 muaj nën vëzhgim, kush janë mjekët që merrnin para në QSUT
• A do të hetojë Kongresi Amerikan Ramën? Republikanët letër FBI-së për McGonigal