Arrestohet në Kosovë kryetari i Partisë Socialdemokrate, Dardan Molliqaj

Njësia e Reagimit të Shpejtë e Policisë së Kosovës ka arrestuar këtë të enjte kryetarin e Partisë Socialdemokrate, Dardan Molliqajn, teksa ishte rrugës për një takim.

Lajmin e ka bërë të ditur me anë të një postimi në Facebook, Partia Socialdemokrate e cila e ka konsideruar këtë arrestim “totalisht jashtë çdo racionaliteti”. Sipas PSD Molliqaj nuk ka marrë ftesë nga gjykata dhe në të njëjtën kohë çdo ditë është në rutinën e tij dhe mund të gjendet lehtësisht.

Sipas PSD kjo sjellje nuk mund të lexohet ndryshe përveç se “presion politik dhe demonstrim force nga një njësi e krijuar për situata emergjente dhe të rrezikshme, jo për të ndaluar opozitën politike”.

“Prioriteti dhe zelli në të cilin janë vendosur anëtarët e PSD-së për “shqyrtim rastesh” lë dyshime se kjo po ndodhë qëllimshëm, meqë një numër të madh rastesh e kanë së bashku me anëtarët e VV-së, duket që mësyrja është kryesisht ndaj PSD-së.

Arrestime të tilla nuk na ndalin, vetëm e bëjnë më të qartë për të gjithë kush ka frikë nga organizimi politik.

Kërkojmë lirimin e menjëhershëm të Dardan Molliqajt”,-thuhet në postimin e PSD-së në Facebook.

LEXONI GJITHASHTU:

• Seanca konstituive në Kosovë, Avokati: Kurti të dorëzojë dorëheqjen në Kuvend
• KDI: Kryeministri dhe ministrat në detyrë në Kosovë të japin dorëheqje formalisht…