Arrestohet për herë të dytë në Dubai i shumëkërkuari Durim Bami

Durim Bami, një emër i njohur në botën e krimit në Shqipëri gjatë viteve të fundit, është arrestuar në Dubai, në kuadër të procedurave për ekstradimin e tij drejt Shqipërisë.

Kjo është hera e dytë e arrestimit të Durim Bamit në Dubai.

Interpol i Emirateve të Bashkuara Arabe në Abu Dhabi ka konfirmuar arrestimin e Durim Bamës, i cili është shpallur në kërkim nga SPAK që nga muaji maj. Arrestimi i tij vjen në kuadër të hetimeve të zhvilluara për dosjen e njohur si “Metamorfoza”, pas zbërthimit të applikacionit Sky ECC, një platformë e përdorur për komunikime të sigurta mes grupeve kriminale.

Durim Bami rezulton i përfshirë në kultivimin e parcelave të drogës në zonën e Fushë-Krujës, po ashtu, mbi të rëndojnë akuzat për sigurimin e kushteve për të vrarë ish-deputetin e Partisë Socialiste në Lezhë, Arben Ndoka, si dhe për sigurimin e kushteve për të vrarë dy miqtë e Ervis Martinaj, Erigers Mihasin dhe Tori Xheçukën.

Autoritetet shqiptare tashmë po punojnë për të organizuar ekstradimin e tij, në mënyrë që të përballë akuzat që rëndojnë mbi të. Mund të ndiqet një mënyrë e ngjashme me Plaurent Dervishaj për ekstradimin e Bamit nga Dubai.