ARRSH thirrje shoferëve, tregoni kujdes dhe udhëtoni me zinxhir në këto zona

Autoriteti Rrugor Shqiptar u ka bërë thirrje drejtuesve të mjeteve për kujdes të shtuar gjatë udhëtimeve në zonat malore.

Përmes një njoftimi në facebook, ARRSH këshillon drejtuesit e mjeteve që të ulin shpejtësinë, të respektojnë sinjalistikën dhe të pasjisen me goma dimërore pasi reshjet intensive të shiut dhe dëborës do të përfshijnë pjesë të ndryshme të vendit.

Apeli më i shtuar është për drejtuesit e mjeteve në zonat malore, ku pritet të intensifikohen dhe reshjet e dëborës.

Për sa i përket rrugës Bogë-Theth, ARRSH bën me dije se pavarëisht reshjeve të dëborës gjatë natës, ky aks është mundur të mbahet i hapur për automjetet.

“Reshjet e shiut dhe të dëborës në Bogë-Theth, kanë vazhduar gjatë natës deri në orët e para të mëngjesit, pa sjellë probleme me qarkullimin pasi kontraktorët me mjete e punëtorë kanë qenë në terren gjatë gjithë natës për të mbajtur qarkullimin në normalitet.

Tregoni kujdes të shtuar gjatë drejtimit të mjetit në kohë me reshje, pajisuni me goma dimërore dhe zinxhirë kur udhëtoni për në zonat malore, ulni shpejtësinë, respektoni sinjalistikën dhe udhëzimet e Policisë Rrugore”, thuhet në njoftimin e ARRSH.

LEXO GJITHASHTU:

• Përkeqësimi i motit, Peleshi zbulon zonat që rrezikojnë të ketë përmbytje
• Përkeqësohet moti në vend, Peleshi: Reshje shumë intensive në Kukës e Shkodër
• Reshje dhe ulje temperaturash, parashikimi i motit për javën