Autori doli nga makina dhe i qëlloi nga afër| Zbardhet dinamika e atentatit në Rinas

Është zbardhur dinamika e atentatit mafioz të ndodhur pasditen e së martës në afërsi të rrethrrotullimit të Rinasit, ku mbeti i vrarë Gilmando Dani, 47 vjeç dhe u plagos rëndë Muçi Shaljani, rreth 40 vjeç.

Sipas pamjeve të kamerave të sigurisë në zonë, autorët e kanë pritur para aeroportit Gilmando Danin dhe Muçi Shaljanin.

Makina e autorit dhe e viktimave kanë lëvizur për disa sekonda paralel me njëra-tjetrën teksa autorët kanë qëlluar me breshëri plumbash.

Në një moment, mjeti tip “Benz” ka humbur kontrollin si pasojë e të shtënave dhe në vend që të bënte rrethrrotullimin ka ecur drejt.

Në atë moment, një nga autorët, i maskuar, ka dalë nga makina, është afruar afër dhe pasi ka hapur derën e pasagjerit ku ndodhej Gilmando Dani ka qëlluar disa herë.

Më pas është kthyer në makinë dhe është larguar drejt Fushë-Krujës.

Policia e gjeti automjetin e djegur të autorëve në fshatin Halil të Fushë-Krujës rreth 40 minuta pas atentatit, ndërsa brenda tij janë gjetur 4 armë zjarri.

Ngjarja e rëndë ndodhi rreth orës 14:00 menjëherë pasi viktima dhe i plagosuri mbërritën nga Barcelona ku ishin larguar në datën 7 nëntor.

Në momentin kur janë nisur drejt Tiranës me automjetin tip Benz me targa AB 099UO, autorët me një tjetër makinë i zunë pritë dhe i qëlluan me breshëri plumbash, ku Gilmando Dani, që ishte pasagjer, ka humbur jetën në vend ndërsa shoferi Muçi Shaljani (Sheqeri) ka mbetur i plagosur rëndë.

LEXONI GJITHASHTU:

• 4 armë zjarri brenda automjetit të djegur pas atentatit, policia jep detajet
• U plagos në atentatin ku u vra Gilmando Dani, publikohet fotoja e agjentit të AMP