Avionët rusë i shkelin hapësirën ajrore, Estonia kërkon konsultime me NATO-n

Estonia ka kërkuar konsultime me anëtarët e tjerë të NATO-s pasi avionët luftarakë rusë shkelën hapësirën e saj ajrore të premten.

Ministria e Jashtme e Estonisë deklaroi se tre avionë luftarakë rusë MiG-31 hynë në qiellin e Estonisë “pa leje dhe qëndruan atje për një total prej 12 minutash” mbi Gjirin e Finlandës.

Një zëdhënës i NATO-s tha se aleanca ushtarake “reagoi menjëherë dhe interceptoi avionët rus”, duke e quajtur atë “një tjetër shembull të sjelljes së pamatur ruse dhe aftësisë së NATO-s për t’u përgjigjur”.

Italia, Finlanda dhe Suedia ngritën në ajër avionë luftarakë në kuadër të misionit të NATO-s për të forcuar krahun e saj lindor. Më vonë, Rusia mohoi shkeljen e hapësirës ajrore të Estonisë.

Tensionet janë përshkallëzuar midis aleancës ushtarake të NATO-s dhe Rusisë javën e fundit, pasi Polonia dhe Rumania, të dyja anëtare të NATO-s, thanë se dronët rusë shkelën hapësirën e tyre ajrore.

Ministri i Jashtëm i Estonisë, Margus Tsahkna, tha se ndërhyrja e së premtes në hapësirën ajrore të Estonisë ishte një “provokim i qartë” dhe u bëri thirrje anëtarëve të NATO-s të tregojnë unitet në përgjigjen e tyre.

“Shkelja prej dymbëdhjetë minutash, shkelje e rëndë, e hapësirës ajrore të NATO-s ka nevojë për një përgjigje të fortë në një nivel politik, si dhe në një nivel praktik”, tha ai.

Ministria e mbrojtjes e Rusisë tha se avionët ishin në një “fluturim të planifikuar, në përputhje të rreptë me rregulloret ndërkombëtare të hapësirës ajrore dhe nuk shkelën kufijtë e shteteve të tjera, siç konfirmohet nga monitorimi objektiv”.

Në përgjigje, NATO u zotua të zhvendosë asetet ushtarake, përfshirë avionët luftarakë, në drejtim të lindjes për të forcuar mbrojtjen.

LEXONI GJITHASHTU:

• Kallas: Shkelja e hapësirës ajrore të Estonisë rusët, provokim i rrezikshëm
• Tre avionë rusë hynë në Estoni, forcat ajrore italiane i zmbrapsën