Avokati Barjami: Isha viktimë e ndalimit të paligjshëm

Avokati Ulian Barjami ka reaguar lidhur me arrestimin e tij, pasi u akuzua se kërcënoi gjyqtarin e çështjes. Bajrami u lirua pak ditë më parë teksa thekson se ndalimi i tij ishte i paligjshëm.

Avokati thekson se Ditën Europiane të Avokatëve duhet reflektuar dhe mbrojtur dinjiteti i avokatit. Ai shtoi se drejtësia nuk ekziston pa avokatin dhe se ata janë mburoja e qytetarëve.

“Sot, në Ditën Europiane të Avokatëve, ndjej më shumë se kurrë peshën dhe përgjegjësinë që mbart ky profesion fisnik. Ngjarja e fundit, ku u gjenda viktimë e një ndalimi të paligjshëm, nuk ishte vetëm një përvojë personale, ishte një kujtesë e fortë se respekti për avokatin është respekt për drejtësinë.

Kjo ditë na kujton se avokatët janë mburoja e qytetarëve përballë çdo padrejtësie. Çdo cenim ndaj tyre është cenim ndaj vetë themeleve të shtetit të së drejtës.

Le ta shfrytëzojmë këtë ditë për të reflektuar, për t’u bashkuar dhe për të mbrojtur dinjitetin e profesionit tonë. Sepse drejtësia nuk ekziston pa avokatin, dhe avokati nuk mund të ekzistojë pa respektin që i detyrohemi si shoqëri”, shkruan ai.

Avokati u lirua nga qelia pasditen e 20 tetorit pasi u ndalua tre ditë më parë nga Oficerët e Policisë Gjyqësore pas një padie të ngritur nga prokurori Gjergji Nika, me pretendimin se ishte kërcënuar nga avokati gjatë seancës gjyqësore në Gjykatën e Elbasanit.

LEXONI GJITHASHTU:

• U arrestua se kërcënoi prokurorin, lirohet avokati Ulian Bajrami
• Arrestimi i avokatit Ulian Barjami, Dhoma e Avokatisë: Kryeni hetim të menjëhershëm