Avokati i Metës, Cakrani: Ish-presidenti nuk është njohur me dosjen

Gjykata e Posaçme këtë të premte shtyu seancën e ish-presidenti Ilir Meta për në datë 22-dhjetor, ku pas këtij vendim ka folur në një deklaratë për mediat avokati i tij, Kujtim Cakrani.

Sipas tij, shkaku se përse Gjykata e Posaçme vendosi të shtyjë seancën paraprake të dosjes ‘Meta’ është se ish-presidenti nuk është njohur me fashikujt.

“Mungonte një prej avokatëve të palëve, të zonjës Kryemadhi, gjithashtu nga gjykata u lanë disa detyra që prokurorët duhet t’i informonin në ambientet e paraburgimit të gjithë fashikujt që ai kërkoi. Gjithashtu i kërkuam të saktësonin dhe akuzën dhe të na sillnin listën e provave. Prokurorët nuk e kishin këtë detyrë, padyshim që ne kërkuam përsëri”, u shpreh Cakrani.

Më tej, Cakrani tha se gjytarja e çështjes, Irena Gjoka, pranon të gjithë kërkesat e prokurorëve të posaçëm pasi ndihet e shantazhuar nga fakti që vetë është në hetim nga SPAK.

“Pati një tension sepse prokurorët kërkuan pezullimin e afateve të paraburgimit për zotin Meta, i cili ishte aty prezent dhe nuk ishte ky shkaktari për shtyrjen e seancës gjyqësore. Pati një tension ndërmjet avokatëve, të paktën ndërmjet zotit Zhllima dhe unë me gjyqtaren Irena Gjoka, e cila e pranoi kërkesën, megjithëse ne nuk e vinim në dyshim që zonja Gjoka pranon çdo kërkesë të prokurorëve.

Zonja Gjoka është e shantazhueshme nga zotërinjtë prokurorë pasi po hetohet nga ata për çështjet e saj personale. Ajo vazhdon të mos i marrë parasysh dhe t’i injorojë kërkesat tona”, tha Cakrani.

Për më tepër, avokati ka theksuar se Meta ka kërkuar të njihet me 2 momente. Atë të CEZ-DIA, po jo me kontratën që nuk kanë lidhje me të, ku sipas tij  ai nuk ka qenë as kryeministër dhe as nuk ka patur gisht, dhe tjetra ka qenë me lobimin.

“Këta janë 2 dosjet që zoti Meta kërkon të njihet me to”, tha avokati.

LEXONI GJITHASHTU:

• Seanca e Metës shtyhet në 22 dhjetor, shkak mosnjohja e ish-presidentit me fashikujt
• Kalon për gjykim apo rikthehet në SPAK? Sot seanca për dosjen Meta