Avokati tregon arsyet: Pse Basha figuron ende kryetar i PD-së edhe pas dorëheqjes

Edhe pse prej rreth 1 viti ka dhënë dorëheqjen, Lulzim Basha, juridikisht ende figuron kryetar i Partisë Demokratike.

Në një intervistë për Euronews Albania, avokati Besart Logu u shpreh se kjo ndodh për dy arsye.

E para, duhet të regjistrohet kryetari i cili ka dalë nga një proces sipas parimit një anëtar, një votë, që sipas tij nuk ka ndodhur dhe e dyta se nuk mund të regjistrohet kryetari i komanduar.

“Zoti Basha, formalisht sot figuron kryetar i Partisë Demokratike. Figuron për dy arsye. E para, sepse ligji për partitë politike, detyron partitë politike të regjistrojnë kryetarin e dalë nga një proces votbesimi. Nëse do i kthehemi statutit të PD-së, thotë; kryetari zgjidhet sipas parimit një anëtar, një votë.

Faktikisht, nga momenti i dorëheqjes së zotit Basha deri në momentin që po flasim, nuk kemi një proces të tillë dhe nuk kemi çfarë të regjistrojmë në Gjykatën e Rrethit Gjyqësor Tiranë. Edhe sikur, ligji për partitë politike do detyronte subjektet politike që të regjistrojnë kryetarin e komanduar apo dorëheqjen e kryetarit, dosja ka qenë në Apel”, theksoi ai.