Deputeti i Partisë Demokratike, Luan Baçi tha se kolegu i tij Ervin Salianji është bërë pjesë e procesit zgjedhor në qytetin e Korçës.
Në emisionin “Now” në “Euronews Albania”, Baçi bëri me dije se Salianji është i angazhuar me seksionet dhe grup seksionet e partisë në Korçë.
“Kam folur me mikun tim dhe deputetin Ervin Salianji. Është në Korçë dhe është bërë pjesë e procesit zgjedhor. Vazhdon të merret me seksionet dhe grupseksionet. Më ka thënë që është në një proces zgjedhor ku ishin zgjedhur dy kryetarë grup seksionesh”, u shpreh Baçi.
Komisioni i Rithemelimit po zhvillon zgjedhjet për kryetarët e rinj të degëve të PD-së në të gjithë vendin. Procesi do të zgjasë deri më 20 prill, teksa vijon të kundërshtohet nga pjesa tjetër e Partisë Demokratike.
LEXONI GJITHASHTU
- ‘Rithemelimi’ organizon sot zgjedhjet për kryetarë në 6 degë
- Shpallen fituesit në zgjedhjet e Rithemelimit për disa degë të PD-së
