Balliu takon Gunther Krichbaum në Mynih: Integrimi në BE jetik për të ardhmen e Shqipërisë

Deputeti i Partisë Demokratike, Klevis Balliu, zhvilloi këtë të shtunë takime me Gunther Krichbaum, Ministër i Shtetit për Europën në Gjermani, dhe me nënsekretarin e Energjisë të SHBA-së, Alexander Fitzsimmons.

Gjatë takimit me Gunther Krichbaum, Balliu theksoi se integrimi i Shqipërisë në Bashkimi Europian është jetik për të ardhmen e vendit dhe për konsolidimin e demokracisë. Ai nënvizoi se vetëm përmes një lufte reale kundër korrupsionit dhe respektimit të ndarjes së pushteteve mund të garantohet përparimi i Shqipërisë në rrugën e saj europiane.

Deputeti demokrat shprehu mirënjohjen për mbështetjen e vazhdueshme dhe kontributin e ministrit gjerman në procesin e integrimit, duke theksuar se mbështetja e partnerëve dhe aleatëve europianë është thelbësore.

Sipas tij, përtej ndihmës ndërkombëtare, mbetet detyrë e institucioneve shqiptare ndërtimi i një shteti të së drejtës me institucione të forta, të pavarura dhe në shërbim të qytetarëve.

Ndërsa në takimin me nënsekretarin e Energjisë të Shteteve të Bashkuara të Amerikës, Alexander Fitzsimmons, Balliu shprehu mirënjohjen për mbështetjen e vazhdueshme që Shtetet e Bashkuara të Amerikës i japin Shqipërisë, duke theksuar rëndësinë strategjike të partneritetit mes dy vendeve në forcimin e sigurisë, zhvillimit ekonomik dhe konsolidimit të institucioneve demokratike.

Ai nënvizoi se opozita shqiptare mbetet e vendosur në luftën kundër korrupsionit, krimit të organizuar dhe lidhjeve të pretenduara mes karteleve të drogës dhe politikës, duke e cilësuar këtë betejë si thelbësore për të ardhmen europiane të vendit.

Balliu vlerësoi gjithashtu angazhimin e administratës amerikane në intensifikimin e luftës globale kundër karteleve të drogës dhe krimit ndërkombëtar të organizuar, duke theksuar se bashkëpunimi i ngushtë ndërkombëtar është jetik për garantimin e demokracisë, shtetit të së drejtës dhe stabilitetit ekonomik në rajon.

Takimi u zhvillua në kuadër të aktiviteteve të sigurisë dhe dialogut ndërkombëtar në Mynih, ku në fokus ishin çështjet e energjisë, sigurisë dhe luftës kundër krimit të organizuar.