Gazeta prestigjioze britanike “The Telegraph” i ka kushtuar një artikull aktivitetit të paligjshëm të bandave kriminale shqiptare që veprojnë në Mbretërinë e Bashkuar. Një prej trafikantëve më të mëdhenj të kokainës, sipas “The Telegraph”, është Bujar Cozminca, i cili jetonte në veriperëndim të Londrës. Ai u dënua me 21 muaj burg për trafik droge në vitin 2012 dhe më pas u deportua në Shqipëri.
Por historia nuk përfundoi aty. Cozminca u rikthye sërish në Britani. Pas një hetimi nga Agjencia Kombëtare e Krimit, ai u arrestua përsëri në maj të vitit 2021. Gjatë kontrolleve, policia gjeti rreth 300,000 £ në para të gatshme, të cilat dyshohet se ishin përdorur për blerjen dhe furnizimin e 100 kilogramëve kokainë, me një vlerë të shitjes prej 3.5 milionë paund. Në qershor të këtij viti, 33-vjeçari pranoi akuzat për trafik droge dhe pastrim parash dhe u dënua me 12 vjet burg nga një gjykatë në Londër.
Sipas autoriteteve, Cozminca nuk vepronte i vetëm, pasi ai kishte lidhje ndërkombëtare me rrjete të tjera kriminale. Ndërkohë, drejtësia britanike po përpiqet të zbulojë dhe të ndjekë penalisht të tjerë të përfshirë në këto aktivitete.
Në një prej dokumenteve zyrtare të Ministrisë së Brendshme të Britanisë (Home Office), grupet kriminale shqiptare përshkruhen si një “kërcënim akut” për sigurinë e vendit. Sipas një analize të dhënave zyrtare të kryer nga “The Telegraph”, rreth 1 deri në 2 për qind e shqiptarëve që jetojnë në Britani janë aktualisht në burg, përfshirë qindra që janë përfshirë në aktivitet kriminal.
Një shembull tjetër i aktivitetit të këtyre bandave është rasti i Edmond dhe Eduard Hazirit, të cilët, së bashku me bashkëpunëtorët e tyre, kanë përfituar qindra mijëra paund duke shpërndarë drogë, shpesh të fshehur brenda biletave të lotarisë. Më 23 mars të vitit 2022, policia arrestoi disa prej anëtarëve kyç të bandës, përfshirë vëllezërit Haziri.
Deri në vitin 2017, bandat shqiptare kishin krijuar një ndikim të madh brenda krimit të organizuar në Mbretërinë e Bashkuar, duke ndërtuar lidhje të drejtpërdrejta me furnizuesit në Amerikën Latine. Një veçori e këtyre grupeve është përdorimi i lidhjeve të besueshme dhe rrjeteve familjare, që sipas ekspertëve, krijon një klimë më të fortë besimi brenda organizatave kriminale.
Një profesore e kriminologjisë thekson se krimi i organizuar që i atribuohet shpesh shqiptarëve përfshin gjithashtu njerëz nga vende të tjera të Ballkanit Perëndimor, si Mali i Zi dhe Serbia. Ajo shton se ndërsa shqiptarët shpesh janë në fokus, fenomeni përfshin një spektrum më të gjerë aktorësh nga rajoni.
Në vitin e kaluar, gjatë një operacioni të madh, u konfiskuan rreth 200,000 bimë kanabisi në të gjithë Mbretërinë e Bashkuar, me një vlerë të tregut që varion nga 115 deri në 130 milion £. Mbi 450 persona u akuzuan për veprimtari penale që përfshinin furnizimin me drogë, pastrimin e parave dhe armët.
Në vitin 2001, një raport i publikuar nga Home Office zbuloi se një mafioz shqiptar kishte marrë kontrollin e tregtisë së prostitucionit në Soho, Londër, i cili më parë kontrollohej nga mafia malteze dhe gangsterët e East End-it. Në atë kohë, ky treg kishte një qarkullim vjetor prej rreth 40 milionë funte. Rreth 70 për qind e saunave dhe salloneve të masazhit në Soho besohej se ishin nën kontrollin e shqiptarëve, duke përfshirë edhe ata nga Kosova.
Në atë periudhë filluan të shfaqen histori horror të vajzave të Evropës Lindore, të cilat ishin detyruar të punonin në industrinë britanike të seksit nga kriminelë të dhunshëm shqiptarë. Deri në tre të katërtat e grave që punonin në shtëpitë publike në Soho besohej se ishin shqiptare, duke theksuar ndikimin e fuqishëm të këtyre grupeve në këtë treg të paligjshëm.
LEXONI GJITHASHTU:
- Raporti i anti-drogës në Itali: Rrjetet kriminale shqiptare po forcohen
- Në kërkim për drogë në Itali, arrestohet në Shqipëri narkotrafikanti
