Banorët e 5 Majit i kërkojnë llogari Ramës për shembjen e banesave

Kryeministri Edi Rama është pritur mëngjesin e sotëm në hyrje të Kuvendit nga banorët e 5 Majit.

Ata i kanë kërkuar llogari kryeministrit për shembjen e banesave dhe se kur do të ndërtohen shtëpi të reja për ta. Nuk kanë munguar edhe akuzat e banorëve ndaj qeverisë për shembjen e banesave, ku janë shprehur se gjithçka është korruptive.

Gjatë bisedimit me banorët, Rama ka marrë vetëm 3 banorë brenda ambienteve të Kuvendit për të dëgjuar problematikat dhe për të biseduar me ta.

Në zonën e 5 Majit pritet të shemben në total 400 banesa nga procesi i rindërtimit. Një pjesë e banorëve nuk kanë firmosur asnjë kontratë me bashkinë dhe nuk kanë një banesë ku të streohen. Ata nuk përfitojnë as pagesën e qirasë.

Në mbështetje të banorëve të 5 Majit janë edhe qytetarët e Paskuqanit dhe Laprakës.