Barcelona leksion “gjerman” Bayern-it, Zhegrova dhuron spektakël ndaj Atletico-s.

9 vite i janë dashur Barcelonës për t’i kthyer reston Bayern-it të Mynihut në një ndeshje të Champions League, ku jo vetëm e fitoi, por i dha një leksion të besuarve të Kompany-t. Një skuadër pragmatiste me një lojë tipike gjermane me topa të gjatë dhe vertikalizime, ide të përkthyera në sukses për trajnerin Hansi Flick. Heroi blaugran do të ishte braziliani Raphinha, i cili realizoi një 3-golësh në portën e Neuer-it, por nuk mund të mungonte as bomberi polak Robert Lewandowski. Në anën tjetër, Harry Kane shënoi golin e nderit për gjermanët, të cilët largohen nga Spanja me kokën ulur, por me një rezultat 4-1, që tregon se problemet janë të pafundme.

Fitore mbrëmjen e së mërkurës morën edhe Liverpool-i, që mposhti minimalisht Leipzig-un në transfertë, Manchester City që likuidoi Sparta Pragën 5-0, apo Inter-i që u mjaftua me golin e Thuram-it ndaj Young Boys. Lille ishte surpriza e padiskutueshme, duke mposhtur një tjetër ekip madrilen, Atletico-n. Vendësit shënuan të parët me Alvarez-in, por Zhegrova nuk e kishte thënë fjalën e fundit. Si zëvendësues, ylli i Kosovës i shtangu të gjithë me një eurogol dhe pas tij David me dopietë vulosi triumfin 1-3.

Benfica u mposht në shtëpi nga Feyenoord 1-3, ndërsa dy përballjet e luajtura pasdite, Atalanta-Celtic dhe Brest-Leverkusen, nuk patën fitues.