Bardhi: PD kërkon mocion me debat në parlament për programin e qeverisë “Rama 4”

Kryetari i Grupit Parlamentar të Partisë Demokratike, Gazment Bardhi, ka bërë publike kërkesën për zhvillimin e një mocioni me debat në parlament lidhur me prioritetet e qeverisë Rama për mandatin e katërt dhe ndikimin e krimit të organizuar në jetën publike.

Bardhi thekson se përgjegjshmëria dhe llogaridhënia e qeverisë janë thelbësore për këtë proces dhe se në parlament duhet të diskutohet bilanci i programit të kaluar të qeverisë, si dhe prioritetet e programit të ri.

Në shkresën e dorëzuar, Bardhi nënvizon rëndësinë e këtij debati në një fazë kyçe për Shqipërinë, që aspiron anëtarësimin në Bashkimin Europian.

“Anëtarësimi në Bashkimin Europian kërkon rritje të qëndrueshme ekonomike dhe përmirësim të mirëqenies së qytetarëve, çështje që duhet të shqetësojnë çdo deputet,” thekson Bardhi.

Ai shton se efikasiteti i qeverisjes lidhet ngushtë me integritetin e ministrave, pasi dyshimet për kriminalizim të jetës politike dëmtojnë besimin tek institucionet dhe marrëdhëniet me partnerët ndërkombëtarë.

Në kërkesën e tij, Bardhi thekson nevojën që deputetët të kenë rol aktiv në avancimin e kësaj axhende dhe nxit Kuvendin të zhvillojë debat mbi ndikimin e krimit të organizuar në politikë dhe jetën publike.

Kërkesa është bazuar në nenin 98, pika 1 të Rregullores së Kuvendit të Shqipërisë dhe synon të vendosë në fokus transparencën dhe përgjegjësinë e qeverisë në këtë mandat.

LEXONI GJITHASHTU:

• Berisha: Do bëjmë padi në SPAK për “Aruba-n”, Rama të japë dorëheqjen
• Balla thirrje opozitës: Sillni propozimet për komisionet, Bardhi duhet të ishte këtu