Bardhi thërret mbledhjen e përbashkët të grupit parlamentar demokrat

Gazment Bardhi ka thirrur mbledhjen e përbashkët të grupit parlamentar demokrat këtë të diel.

Sipas tij është e nevojshme një opozitë e fortë dhe e unifikuar që të jetë funksionale.

Bardhi u shpreh se në 2 vitet e fundit lufta e brendshme e Partisë Demokratike ka dobësuar opozitën duke e shpërqëndruar nga misioni për të rrëzuar qeverinë dhe duke i ofruar Ramës një komoditet të pamerituar.

Në këto kushte ai theksoi se është e nevojshme që në mënyrë urgjente të gjendet një zgjidhje në interes të përbashkët të opozitarëve dhe qytetarëve të vendit.

Deklarata:

Ndasitë në mendime dhe qëndrime për çështje të ndryshme brenda Partisë Demokratike nuk duhet të na shfokusojnë nga përgjegjësia që kemi ndaj vendit dhe qytetarëve. Kam bindjen e plotë se çështjet që na bëjnë bashkë janë më shumë se çështjet që na ndajnë.

Duke ruajtur dhe respektuar qëndrimin apo mendimet individuale të çdo deputeti për zhvillimet apo debatin e brendshëm në Partinë Demokratike dhe në kampin opozitar, ndaj bindjen me shumicën e kolegëve që kjo nuk duhet të na pengojë për t’u bashkuar dhe për të unifikuar qëndrimin dhe aksionin opozitar kundër keqqeverisjes së Edi Ramës.

Për këtë arsye, në cilësinë e Kryetarit të Grupit Parlamentar të PD, në nisje të këtij sesioni parlamentar, do të ndërmarr nismën për thirrjen ditën e martë, datë 5 Shtator 2023, të një mbledhje të përbashkët të të gjithë deputetëve të koalicionit “PD-AN”, pa asnjë përjashtim. Duke besuar se shqetësimi për nevojën urgjente të unifikimit të opozitës bashkëndahet nga çdo deputet që ndien përgjegjësinë për një përballje të unifikuar kundër Edi Ramës, mirëpres pranimin e kësaj thirrje të sinqertë, me qëllimin e mirë të përcaktimit të axhendës dhe strategjisë së përbashkët të të gjithë PD dhe të gjithë opozitës parlamentare.

LEXONI GJITHASHTU:

• Kadilli akuzon Bardhin: Po ndjek karrierën politike për interesa personale
• Grupi i Bardhit drejt bashkimit me Berishën? Gazetari zbulon prapaskenat