“Bariu pa trupin e Kurtdedës”, Maçi tregon çfarë zbuloi policia në vendngjarje

Gazetari Merin Maçi tregoi në Review në Euronews Albania se si një bari gjeti trupin e dhunuar dhe të djegur të 61-vjeçarit Menduh Kurtdeda.

61-vjeçari u gjet pjesërisht i djegur dhe pjesërisht i dekompozuar në Kodër Shupal, vetëm disa kilometra larg Tiranës, në rrugën e Arbrit.

“Ka qenë një prej fshatarëve të zonës i cili ka qenë duke kullotur bagëtitë e tij, ku në një distancë rreth 200 metra ka parë qentë që shoqëronin kopenë e bagëtive të lehnin në një mënyrë të pazakontë, të paktën kështu e ka sqaruar ai në polici, dhe ka konstatuar një trup thuajse tërësisht të djegur. Më pas është vënë në lëvizje policia,” – u shpreh Maçi.

Gazetari tregoi se policia ka gjetur në vendngjarje copa të pantallonave të viktimës, një rrip dhe një USB. Disa metra larg vendit ku ishte trupi u gjet dhe një bidon uji brenda të cilit ishte futur lënda djegëse që u përdor për t’i vënë flakën trupit të Kurtdedës.

Viktima fshihej prej kohësh pasi kishte një borxh me vlerë 1 milion lekë të reja ndaj të dashurës Marjeta Karaj.

Marjeta Karaj së bashku me të birin, Besmir Karaj, dhe shokun e tij Gazmir Ngota sapo zbuluan se ku ndodhej 61-vjeçari arritën ta fusnin me forcë në makinë dhe më pas e çuan në zonën e Alliasit, ku e rrahën. Më vonë, Karaj dhe Ngota, e çuan në një zonë pyjore, në Kodër-Shupal ku e lidhën me litar dhe e dogjën.

LEXONI GJITHASHTU:

• Si e njohin fqinjët Marjetën, vrasësen e të dashurit të saj për borxhin
• FOTO/ Ky është 61-vjeçari që u vra për 1 mln lekë, urdhri u dha nga e dashura