Bashkimi Evropian drejt një plani emergjent financimi për Ukrainën

Udhëheqësit e Bashkimit Evropian po afrohen drejt një zgjidhjeje të përkohshme financiare për Ukrainën, ndërkohë që Belgjika ka ngritur pengesa të reja ndaj kredinë së dëmshpërblimeve që synon të përdorë asetet e ngrira të Bankës Qendrore Ruse.

Zgjidhja emergjente parashikon që BE-ja të marrë fonde në tregje dhe t’i sigurojë Kievit një grant të pakthyeshëm për të mbuluar nevojat më të ngutshme financiare dhe ushtarake në vitin 2026.

Kjo qasje do t’u jepte udhëheqësve evropianë më shumë kohë për të negociuar kredinë ambicioze të propozuar, e cila mbështetet te përdorimi i rreth 185 miliardë eurove të mbajtura në Euroclear, depoja qendrore e letrave me vlerë me seli në Bruksel — duke e bërë Belgjikën vendimmarrësen kryesore në këtë proces.

BE-ja shpresonte të arrinte një marrëveshje gjatë samitit të 18 dhjetorit, por një kthesë e re ndodhi kur kryeministri belg Bart De Wever i dërgoi një letër të ashpër presidentes së Komisionit Evropian, Ursula von der Leyen. Në letër, ai e cilëson kredinë e dëmshpërblimeve si “thelbësisht të gabuar” dhe të mbushur me rreziqe ligjore e financiare.

Përballë këtyre kundërshtimeve, zyrtarët e BE-së po pranojnë gjithnjë e më shumë se një mekanizëm i përkohshëm mbështetës është i domosdoshëm për të garantuar stabilitetin ekonomik të Ukrainës.

LEXONI GJITHASHTU:

• Moldavia mbyll përkohësisht hapësirën ajrore pas inkursionit të dronëve
• Zbulohet statuja 1800-vjeçare në një qytet të lashtë në Turqi