Bashkimi Evropian planifikon të vendosë sanksione për bankat më të mëdha ruse.

Një gjë të tillë e ka konfirmuar presidentja e Komisionit Evropian, Ursula von der Leyen për mediat gjermane.

“Po shikojmë për masa të tjera në sektorin bankar, sidomos Sberbank, që përbën 37% të sektori bankar rus”, tha von del Leyen për “Bild”.

Von del Leyen thotë se BE po punon për “mekanizëm të zgjuar” për të përfshirë dhe naftën në sanksionet e radhës, raporton ‘Reuters’.

SHBA ka vendosur disa sanksione për Sberbank dhe disa banka të tjera në Rusi.

Për këtë bankë gjithashtu edhe Mbretëria e Bashkuar ka përcaktuar masa kufizuese.

Mbretëria e Bashkuar është shprehur se do të ndalojë të gjithë importin e qymyrit dhe naftës ruse deri në fund të 2022.

Në raundin e pestë të sanksioneve, BE ka bërë me dije një numër kufizimesh përfshirë “ndalimin e të gjithë transaksioneve” për katër banka që dominojnë 23% të sektorit bankar në Rusi.