Begaj vizitë zyrtare në NATO më 7 mars

Presidenti i Republikës, Bajram Begaj do të zhvillojë një vizitë zyrtare në NATO, më datë 7 mars.

Kreu i Shtetit do të ketë një takim me Sekretarin e Përgjithshëm të NATO-s, Jens Stoltenberg, me të cilin do të diskutojë lidhur me  zhvillimet strategjike dhe të sigurisë në krahun lindor të NATO-s dhe Ballkanin Perëndimor.

“Temë e diskutimeve do të jetë vijimi i mbështetjes për Ukrainën; angazhimi dhe kontributi i Shqipërisë në NATO, si edhe pritshmëritë për Samitin e ardhshëm të NATO-s, që do të mbahet në Vilnius, Lituani, në korrik të këtij viti. Në këtë vizitë zyrtare, Presidenti Begaj do të shoqërohet nga Shefi i Shtabit të Përgjithshëm të Forcave të Armatosura të Republikës së Shqipërisë, Gjeneral Brigade Arben Kingji dhe anëtarë të kabinetit të tij”, thuhet në njoftimin e Presidencës.

Kjo është vizita e parë zyrtare në NATO e Presidentit Begaj në cilësinë e Presidentit të Republikës.

LEXONI GJITHASHTU:

• Vrasjet e tri grave në Tiranë, Begaj: Organet të veprojnë me forcën e ligjit
• Tragjedia në Greqi, presidenti Begaj shpreh ngushëllimet