Bejko: Zgjedhja e Dumanit revoltoi Ramën e Berishën, Meta u tregua më i përmbajtur

Pedagogu Roland Bejko ka theksuar se kryeministri Edi Rama, kreu i PD-së Sali Berisha dhe kreu i PL Ilir Meta janë bashkë edhe kur zihen.

Në një intervistë për Euronews Albania, ai theksoi se fakti që Altin Dumani u zgjodh kreu i ri i SPAK, revoltoi Ramën e Berishën, ndërsa sipas tij Meta u tregua më i përmbajtur.

“Ata mbajnë njëri-tjetrin, e kam fjalën për Ramën, Berishën dhe Metën. Fakti që u zgjodh kryetari i ri i SPAK dhe Berisha e Rama e humbën qetësinë e tyre ndërsa Meta u tregua më i përmbajtur, kjo do të thotë se ata të dy kanë më shumë frikë”- tha Bejko.

Ai foli dhe për situatën brenda PD, duke thënë se kjo parti është e ndarë; ndërsa ka theksuar se nuk e kupton pse Berisha kërkon të futet te grupi i deputetëve të Enkelejd Alibeaj, grup të cilin para disa kohësh deklaroi se nuk e njeh.

“Tani është fakt që PD është e ndarë. Kjo pjesa e ‘Foltores” e ka përjashtuar Alibeajn dhe ne të tjerët. Demokratët donin shpresë e në këto kushte ndërtuan një realitet të tillë që janë vetë viktima të këtij realiteti. Vetë Berisha nuk e pranon Alibeajn dhe grupin nuk e njeh; çfarë kërkon të futet te ky grup? Të marrë dhe të formojë grupin e vet. Ky është realiteti, PD është e ndarë”- theksoi Bejko.

Ai u ndal sërish te tre liderët politikë duke theksuar se Berisha, Rama e Meta luajnë fort në arenën politike.

“Të tre palët si Berisha, si Rama, si Meta nuk i flasin opinionit publik që është përtej militantëve te vet. Rama e di se me militantët, me patronazhistët i fiton zgjedhjet duke pasur Berishën përballë dhe një opozitë dhe PD të ndarë. Të tre luajnë fort në arenë në mënyrë që të forcojnë radhët brenda vetes.”- përfundoi ai.

LEXONI GJITHASHTU: 

• ‘SPAK-u, instrument i PS-së’, Berisha: Asgjë nuk ndryshon me Altin Dumanin në krye
• Votimi për Avokatin e Popullit, Berisha: I turpshëm, Rama hodhi poshtë kandidaturat
• Gjiknuri zbulon se si PS do të zgjedhë kandidatët për zgjedhjet lokale